MARAHIL

October 13, 2007

Kung ang G ay nakalaan para sa A

Kung ang T ay nakalaan sa B

O ang titik C ay may katapat na K

O kaya naman ang S ay may katunog na Z

Kung ang U ay pwedeng V

At ang L ay may E

Marahil ang J ay mayroon din

Na mayroon ding nakalaan para sa kanya

Ang bawat nilalang ay may bawat kapareha

Marahil ako ay may kalahati ding kapareha

Na siyang bubuo ng aking pagkatao

Ang kalahati ng aking puso

Kung sila ma’y nakalaan para sa kanila

Marahil ako din ay may nakalaan para kanino

Marahil ako di’y may kalahati na nasa kanya

Marahil ako di’y may nag-aantay, marahil…

Kung sakali mang dumating ang kalahati ko

Marahil magiging buo na ako

At tanging alay ko ang tapat na pag-ibig

Marahil kung siya man ay darating sa buhay ko

Ang puso ko’y patuloy na nag-aantay

Puso ko’y purong maibibigay

Sa isang puso ring nag-aantay

Dalawang pusong magdadamayan

Kung ako’y maghahanap ng pusong nag-aantay

Ang tanging hiling ko’y puso niya’y dalisay

At tanging tibok ay sa Kanyang Maykapal

At tanging hangad sa Kanya’y maibigay

Pusong tapat, pusong dalisay, pusong irog

Sa mundong ibabaw buhay ay muling iinog

Kaligayaha’y makakamit, wagas na pag-ibig

Pusong nagmamahal, pusong naglilingkod

Kung pag-ibig ay darating, wag pipigilan

At hayaang ang Diyos ang Siyang gumalaw

Magtiwala at manalig Siya’y dumidinig

Puso mo’y kilala Niya, puso mo’y nakatakda na

Kung pag-ibig ay darating, kusang titibok

Malalaman mong siya ang kalahati ng puso mo

Pagkat siya’y nakalaan lamang para sa iyo

Walang kahati, walang kaagaw

Marahil pag-ibig ay napakaganda

Lalo na sa darating at nag-aantay na pag-ibig

Marahil si J ay may nakalaan din

Marahil… marahil…